KRISTAA HAHCHAWLH NUN THURUK

-Rev. Lalzuitluanga

Chang thlan: Mathaia 11:28 “Nangni thawkrim leh phurrit phur zawng zawng te u, ka hnenah lokal ula, keiman ka chawlhtir ang che u. Ka nghawngkawl bat ula, ka hnenah zir rawh u; thuhnuairawlh leh rilrua inngaitlawm tak ka nih hi; tichuan in thlarau tan chawlhna in hmu ang.”

Tunlai khawvel nun tlan chak tak karah hian hahchawlh nun hi ringtu mimal tinte mamawh a ni theuh awm e. Khawvel changkanna in mihring nun nasa takin min kai a, mahni  zawn theuhah khawsak  changkan tumin nasa takin kan hma theuh sialin kan tlan chur chur a. Hmanlai kan mizo pipute huna in lenpawh leh inkawm hlimna(fellowship) nun a awm ta mang lo. Kan inkawmna thian te chu TV, Computer, Internet, Mobile etc. ah a lo chang zo ta. Kan taksa in thutna dup nuam takah thu mahse, kan rilru ngaihtuahna leh suangtuahna chuan kan thutlai reng pawhin kan thil hmuh leh hriatna ten min hruaikal reng a, a hahchawl tak tak  chuang lo  ani. Kan rilru a hahchawl lai tak tak chu zana kan mutthilh hlan reilo te kar hi a ni mai awm e. Khum mattress dup nuam tak chungah kan taksa chu zal mahse kan ngaihtuahna chu kan nitin  khawsak ngaihtuahna in hahchawl thei lovin min tibuai reng tho a ni. Kan khawvel tar tawh takah hian mahni tihsual pawh ni lo, mite tihsual avanga nun hrehawm tuar leh hahchawlhna hmu thei lo tam tak kan awm awm e. Thenkhat chu chhung leh khat fam chang tate ngaia tap leh lungngai te, ruihhlo leh sual kawng hrang hrangin a tihbuai avanga nun hahchawlhna hmu lo te pawh kan ni awm e. 

Hengtiang hi kan tunlai khawvel thil tawn leh nun dan anih tawh avangin, kan rilru, taksa  leh thlarau hian Pathian lam hawia ngaihtuahna senga amaha tihtak zeta thlarauva hahchawlhna zawn hi a ngai a ni. Kohhran lamah pawh theihtawp chhuaha Pathian rawngbawl tumin apui anawiin kan phe suau suau va, kawngkhata han thlir chuan a hlimawmin a nuam hle  a ni. Hei tluka rilru hahdamna leh thlamuanna dang a awm thei chuang dawn em ni a tih theih awm e.

Mahse hetianga a nawlpuia kan phet suau suau lai hian, kan thlarau nun erawhchu a tak takin Pathianah a hahchawl thin em  tih mahni theuh in zawt teh ang u. Mihring hian buai reng rengin khawvelah hun hi kan hmang emaw ni tih mai tur a ni tawh a. Chuvangin ringtute hi hetiang ang buaina khawvela cheng pawh nimah ila, kan nun hian Kristaah hahchawlhna thuruk a nei fo thin tur a ni. Chu chu Lalpa duhzawng pawh ani thin a ni. 

Ringtu  tamtak te hi chu Pathian hriatna leh pawlna tak tak pawh nei chuang lem lovin mite tih avanga tive mai leh rawng tepawh bawl ve mai engngemaw zat kan awm thei awm e. Kohhrana kan mawhphurhna te hi titura min tuk avang chauhva ti ni lovin, chak taka Pathian avanga ti kan nih hi ava pawimawh tak em. Lal Isuan, “ Buh lem leh buh tak chu lo toza rawh se,” a tih ang deuh khan he khawvelah chuan tumah a lem leh atak kan inthliar thei tawh si lova. Pathian nuna neitu tak tak te chuan Lalpaah kan thlarau nun a hahchawl fo thin a, a hahchawl  tur pawh a ni. Chu chu Lalpa mite nun dan tur a ni si a. Kan rethei emaw, kan hausa emaw, kan khawsa thei emaw thei lo emaw lam Pathianin min en lem lo. Khawvel mite chuan a hmuhtheih khawvel chauh a thlir thin a, a rilru pawh a nghat thin. Lalpa mite erawh chu he khawvela awm nimah ila, van khi kan thlir tel thin a ni. Chuchuan nun hahchawlhna leh thlamuanna min pe thin a, thlarauva hlimna leh lawmna pawh kan chang thin.  Paula chuan, “Kei zawng eng ang pawhin awm mah ila, lungawi zel ka ching tawh si a,” (Phil. 4:11) ati a ni. Pathianina min hunna leh min dahna ang angah hian lungawi thiam ila, chu chu nun hahchawlhna tha tak pakhat a ni. 

Kan khawvel hun tawng hi a in her danglam chak  hle a. Chutiang bawkin kan nun pawh chak takin a in her danglam ve thin. He khawvelah hian Mihring mita thliar theih lohvin sual leh tha kan inpawlhsawp tawh a. A huai leh ngam apiang dinchanna khawvel a ni chho mek. Hetiang ang khawvela cheng kan nih tawh avangin kan nun hi Kristaah thuhruk kan nih theihnan,  amah Lal Isuaah I hahchawl thin ang u. Lal Isuan min sawmna hi hriain kan nun pumpui hi a hnenah pe ila, a hnenah I hahchawl fo ang u. Amah ngeiin a hnena chawl tura min ti si a. Amen.