SIMNA (REPENTANCE)-IN A KEN TEL

-Rbt. C.Rodingluaia

“Sim ula, in sual ngaihdam nan Isua Krista hmingin Baptisma chang theuh rawh u; tichuan Thlarau Thianghlim pek hi in hmu ang,”. (T.T 2:28) Ringtu nunah hian simna hian hmun pawimawh tak a luah a, awmze ril tak a nei a, tawite a sawifiah theih mai niin alang lova. Simna in a ken tel leh a huam te a tlangpui i han ngaihtuahho teh ang u.

Mifingte thiamna, hriatna pawhin a chhuichhuah phak rual lohvin; kan Pathian chuan lei leh van, leh mihring (Adama) a siam a. Tin, Adama leh Evi chu Eden huanah a dah a, Pathian nen thlamuang leh hlim takin tlai nemah te an lengza thin a ni. Nimahsela, Adama leh Evi (Thlahtu bul) chu bawhchhiatna ah an lo tlu ta hlauh mai a, hmangaih leh duhsak taka Siamtu lakah helin, a thupek pawisa lovin, setana thu an lo awih/zawm ta zawk a. Chuvangin Pathian leh mihring in zawmna chu a lo tawp/chhe ta a, mihring chu Pathian lakah ‘THI’ kan lo ni ta. Tichuan, mihring chu Pathian lak ata in la hrangin, “a chhia leh tha” hriatna, setana zia chu mihringah a lo lut/piang nghal a ni. Mihring chu Pathian hriatna dan ata paihchhuahin a awm a, setana hriatna dan in, ama duh dan leh tha a tih angin a nung ta a ni. Chuvangin mihring chuan Pathian ropuina a chang zo tawh lova, Pathian a tilawm thei tawh lo a ni. (Genesis 1, Rom 3 :10-17)

Lal Isua ringtu nunin a ken tel ngei ngei tur chu simna hi a nih avangin Piantharna leh simna hi inzawm tlat a ni a, then hran theih a ni lo. Chu simna chu kan sualna zawng zawngte avang a inchhiarna tih tawh lohna mai nilovin, bawhchhiatna avang a kan hriatna dan, setana hriatna dan a kan inhriatna a bo a bang awm lova Isua Krista Kross thiltihtheihna chimral a, Isua Krista Kross Thutaka thlakthlengna hi a ni. (II Kor 5:16-17)

Saula, Tirhkoh Paula chu ama chhia leh tha hriatna dan hmachhuanin rawng a bawl a, a thawh nasat poh leh Pathian pawi a sawi tam ting mai a ni. (TT 8:1-3) Mi tam tak setana’n min bumna chu, kan chhia leh tha hriatna thuam mawi a Pathian tihlawm kan tumna hi a ni a, eng anga tha leh fel leh dik pawhin han cheibawl mahila, Pathian mithmuh ah chuan,’Tenawm leh bawlhhlawh pawnchhe hnangkhai’ ang chauh a ni si a.

Tirhkoh Paula’n Damaska khawdai ah piantharna a chan hnu khan, a rilru leh a hriatna dan zawng zawng chu Isua Krista Kross thutak ah thlakthleng a lo ni a. Chuvangin Isua Krista rilru puin, a hmusit leh a tihduhdah thinte nen a Lal leh a chhandamtu Krista rawngbawl nan a nun pumpui a hlan ta zawk a ni.

He simna, kan in hriatna dan setana zia Isua Krista Kross thutakah thlakthlengna hi mihringin a tihtheih rual a ni lo. Nimahsela, Pathian hmangaihna leh khawngaihna ropui tak avangin A fapa mal neih chhun min pe a, chu chuan Kross a thihna ngei chuan a lo thawk zo vek tawh a. Chu chu a thlawn liau liau in nang leh kei hian,”Rinna” in kan lo chang ve/nei ve thei ta a nih chu. Pathian nena in zawm lehna changin, lung ang a sak rilru chu tisa ang nem rilru leh thinlung thar min siamsak a, nitin Krista an na leh hriatna a thang lian zelin simna thinlung, Thlarau Thianghlim zarah kan lo chang ve ta a ni. “Inkhawm ringawt a ni lo, thilpek ringawt a ni lo,lam ringawt a ni lo...etc.” ti thin pawh khan Kohhran hote inpawlhona a lo thlahlel tawh a, lawm takin Lalpa tan thilpek a hlan tawh a, hlim takin Pathian fak leh chawimawiin a lam thei ta a ni. Pathian hmangaihna chu a nun laimu leh kaihruaitu atan a hmang zelin, hlim leh lawm in, thlamuang leh hlau lovin, Thlarau Thianghlim hruaina leh thiltihtheihna in Lalpa rawngbawl nan a nun pumpui a lo hlan thei ta a ni. Ava ropui em!

Lalpa chu fakin awm rawh se.