EIZAWN DAN DIK

-Rev. H.Hrangêna (L)

Kan eizawnna reng reng ah hian Pathian thil siam dangte hmanga eizawng kan ni ber a. An hotu leh roreltu kan ni a, dek chawk thei pawh kan ni reng a. Amaherawhchu, kan eizawnna kawnga thilsiam dangte kan hman dan hi a diklo (corrupt) lutuk thin a ni.

Mizoram Synod chuan, kum 1982 kha ‘Corruption do kum’ tiin a puang a, lehkhabu pawh a ziah kha. ‘Corruption’ chu duhamna avanga chhiatna a ni ber ang chu. Mihring nun chu sualna avangin chhiatna bawihah a lut a, Kristaa tlan chhuah kan nih tawhhnu hian chu chhiatna atang chuan a chhuak tur a ni ang. Mahse, Kristiante zingah ngei pawh hian chu nun chhia chu a hluar zel a, kan eizawnna kawng hrang hrangah hian a lang chhuak si thin a nih hi. Mi hlep ruk leh thamna lak rukte chu corruption-a ngai a, mahni hmazawna eizawnnaah erawh chuan kan corrupt leh corrupt loh kan ngaihtuah them te si lo. Ei zawng lo theilo kan ni si a, kan eizawnna ngei hi kan chhiatphah zel dawn a ang hle.

Mi thenkhat te’n Office hna an thawk a, thenkhat an sumdawng a, thenkhat te’n thlawhhma an siam a, thenkhatte erawh chuan huan an siam thung a. Heng hi Pathian ruat a ni a, thianghlim tak leh thahnemngai taka thawh tur a ni. Tichuan, kan thawhrimzia ang zelin Lalpa’n mal a sawm dawn a ni.

Amaherawhchu heng eizawnna tikhawlo thei thil eng engemaw a awm, chung thilte chu hengte hi an ni:

Duhamna: Kan eizawnna kawngah kan duham tial tial a, eitur aiin khawl tur lamin kan rilru a luah khat thin. Khawl turi hmuh theih nan kawng dik a ni emaw, nilo emaw a remchan dan ang angin kan lakhawm ta thin a ni. Duhamna chu milem biakna a ni si a. Kristian milem be tlat si kan awm ta nial a nih chu.

Nawmchenna: Duhamna chuan nawmchenna a hring chhuak thin. A ei a ei te, a neih a neih te duhtawk lova, a chen a chen kan duh ta a ni. Chu dinhmunah chuan insumna reng a awm lova, sual pakhat atangin sual dangah a pakai zel a, nun pumpui a tichhe thin a ni.

Kan eizawn dan a dik tawk loh phawt chuan, hmanruaa kan hman thin thilsiam dangte chu chhiatna bawihah kan hnuk lut mek zel a ni e. Tunlaia kan tangka hman thin hi thing leh mau atanga siamchhuah mai a ni awm e. Chutih laiin a lem te a lo chhuak leh ta zel ni tur a ni. A lem a inpeipungte chuan, thing leh maute chu chhiatna bawihah an hnuk lut mek a, an mahni ngei pawh hnuh tel ve an ni. Mahse an dinhmun an hre lova, siam an nihnaa a laichin thing leh mau te’n, “Awi ka nu!”, an tih vawng vawng laiin, an ni’n, “Nuam singkaw,” an ti thung. He thil hi sawrkar dan bawhchhiatna mai a ni lovang, Pathian dan bawhchhiatna a ni zawk a ni.

Hnatlang thawhnaa ka tel ve tumin, in chhun kan khang dawn a, thingzai chartin hman tur a ni. Thenkhat a tê deuhva, thenkhat a lian deuh bawk a. Thian pakhat chuan, “A tê ho zawng hi Mizo chartin a ni a, a lian ho zawng hi vai chartin a nih dawn hi” a ti ta rohva. Chutiang bawkin UT cubic lung tih te leh Returnee cubic lung tih te chu Sawrkar cubic lung nen a intiatlo a ni awm e.

Thenkhatin Office hna thawkin ei kan zawng bawk a. Mahse eitur hi pum tan a ni tih chin chauh kan hre bel a. Ei kan hmuh phawt chuan a hna lam a that leh that loh kan ngaihtuah teh chiam lo.

Lo neihna kawngah pawh kan ram te hi a nuar zo ta em ni ang? Kham khawp thlo chhuak theilo kan awm ta meuh lo. Vai buhfai, vai âlu leh thildangte kan ring ta a. Min petute chu , “Vai chhia, vai chhia” kan ti leh hlauh si. Zofate hi mi chapo, pachhia zawng kan ni e.

Eizawnna kawnga kan rinawm loh chuan nghawng dang eng engemaw pawh a nei tel a ni.

1. Thilsiam dangte nena kan inlaichinna kan mausam a ni.

2. Pathian mawhphurhna min pek kan hmang dik lova, thilsiam dangte Pathian ropuina atana hmang lovin, a tuar tirtu kan ni zawk.

3. Pathian laka pawikhawih kan ni.

Eizawnna kawng dik leh thawhdan dik tak chu kan chhia leh tha hriatna hian min hrilh thin. Mahse, duhamna leh nawmchen chakna te hian min hruai bo thin. Kristiante hi chu chakna sual chuan min bawih reng dawn em ni ang le? Bawih ni lo turin Krista’n min chhuah tir tawh a nih si kha!

Chuti nilova, hausak tum vang ringawta pawisak kan neih miah loh chuan Lalpa rorelna hmaah kan la ding dawn si a. Chutih hunah chuan ‘Hausa’ tih te ‘Rethei’ tih te hi a awmze dik tak kan hrechiang tawh ang. Mi te ngaiha hausa fu, mi rethei mawngbal a awm theih dawn ngei a ni. “Tangka sum ngainat hi sual tingreng bul a ni si a.” I Tim 6:10

Engpawh ni sela, kan eizawnna thu-ah hian hei hi hriat a tul ta. Thildangte nena bul hmunkhat nei a min siam dan theihnghilh loh a ngai. Contract hna kan thawhnaah te, kan thlawhhma lakah te, kan sumdawnna kawngah te siamtu Pathian thilsiam dangte nen, a thlum a al eiza tura inlaichinna min pek leh anmahni enkawl tura mawhphurhna min pek hi ngaih pawimawh hle a tul a ni. 

Tun damchhungah hian ka chhekkhawm tam thei a nih pawhin a tha e. Ka chhekkhawm tam theilo a nih pawhin, Pathian min ruat dan hi ka hlenchhuah phawt chuan, “I pa lawmnaah lut rawh,” tih ka hlawh ngei ang.