I PATHIAN TAWK TURIN INPEIH RAWH

(THI TURIN INPEIH RAWH) AMOSA 4:12

– Upa K.Rozara

He thu hi Pathianin zawlnei Amosa hmangin a sawi a ni a. Amosa hi ran rual vêngtu leh theipui thing enkawltu a ni a (7:14). Mi hausa nge a nih mi rethei tih thu-ah hian mi thiamte ngaihdan a inrual lova. Lal Isua pian hma kum 760 (BC 760) vela rawngbawl tan a ni a, ‘Zawlnei tê’ an tih zinga mi a ni. Mahse ‘Zawlnei tê’ (Minor Prophet) tih hi anmahni an nêp tihna ni lovin an lehkhabu a tê (tawi) tihna zawk a ni.

Amosa hun lai hian Israel ramah mi hausa leh rethei kar a zau hle a. Mi hausate’n ‘Nipui in’ leh ‘Thlasik in’ te an neia saingho khumah an mu a, sakhua an ngaihsak hle a. Hâlral thil hlanah ran thau tha tak tak hlânin Kût ni leh inkhawmpui pawh urhsûn tak takin an hmang a. Mahse Pathian chuan,  “In inkhawmpui urhsûnte leh in hâlral thilhlante hi engatan mah ka ti lo, ka pawm lo a ni, in zâi leh tingtangte pawh hi la bo rawh u, ka tân bengchheng mai a ni,” (5:21-23) a ti a ni. Bethel leh Gilgal-a an inthâwi thinte pawh chu, bawhchhetu leh bawhchhiatna tipungtu mai an ni tih a sawi a. Sawma pakhatte pawh chu ni thum dan zêlah an pe thin a ni maithei, mahse Lalpa a lawm tlat lo (4:4-5).

Lalpa chuan, “In lo lam thlâi tân a tul lai takin ruahtui ka tikang a, tui in tûr takngial pawh khamkhawp in hmu lova, in thlâi pawimawh Grep-te, theipui thing leh Olive-te pawh thingngêt pangang ka ei hlum tir a, Aigupta ram ang maiin in zingah hripui ka lên tir a, chuti chung pawh chuan ka hnena lo kîr nachâng in hre tlatlo mai a, chuvangin a aia nasa zâwk hi in chungah harsatna ka thlentir leh dawn a ni. Chuvangin, “Aw, Israel, I Pathian tâwk tûrin inpeih rawh; Thi tûrin inpeih rawh,” (4:12) a ti ta a ni. Heti khawpa mi awmthei (hausa) an nuam tawh chung hian duhtâwk nei lovin, mi rethei lu chunga vaivut takngial pawh an la ît a, mi rethei (tlachham) chu pheikhawk bun khat-ah an hralh a. (2:6-7) (Hei hi mi retheiin pheikhawk bun khat man lek pawh ba se, a rulh theih loh chuan bawih-ah a hralh mai thin tihna a ni.) Heng ho hian thuneihna changa thamna te la a, ro an rêl lai hi chuan mi fing tân chuan ngawih reng mai a ngai a ni. (5:13)

A va mak êm êm ve! Heti tak hian a ni maw Israel hote hi an lo sual, an lo va nikhua lo êm êm ve! i ti a ni mai thei. Kan khawtlâng leh ram te hi han ngaihtuah teh, engnge kan nih bik chiah le? Mi hausa an lian tual tual a, mi retheiin thil tê tham deuh pawh an tih sualin Jail bang an zût a, mi lian leh thil tithei deuh chuan thil an tisual ve thei ta lo a ni mai em? Kan ram, Kristian ramah hian ‘DIKNA’ hi a lal tak tak em? Mi rethei, a nêk nuam hian an tuar zel a ni mai em? Pathian hi thilpêka tlawn lungawi chi a ni lova, tham lungawi chi lah a ni hek lo. Rorêlna dik leh dikna hi Lalpa lawmzawng a ni. (5:24) I thinlung zâwk kha a ni pawimawh chu. Harsatna lo thleng thin te hi ‘Warning’ a ni ve mai ang em? Tunhnaia kan khawtlânga thihna lo thlengte hi ngaihtuah teh, thi tur hian upat kher a ngai lova, cancer kher leh rei tak damloh kher a ngai lo. Englai pawh hian ‘I Pathian tâwk tûrin inpeih rawh” (Thi tûrin inpeih rawh) (Amosa 4:12)